Menu
Menu
Stories
“Bha a’ bhùth an toiseach aig oisean anns na Haun. Chan eil sgeul air an t-seann bhùth an diugh, tha i air a leigeil,” dh’innis Catrìona, manaidsear na bùtha dhuinn “ ’S e Eoin an t-ainm a bh’air an duine aig an robh i. Ach nuair a thàinig esan gu aois retireadh thàinig na daoine a bh’anns a’ choimhearsnachd còmhla airson a’ bhùth a chumail fosgailte agus ’s e co-chomunn a th’innte.”
“Mar a thòisich i an toiseach bha sgeama a’ dol a bha a’ toirt seachad airgid dhen aon suim ’s a thogadh muinntir an àite.” Thàinig na daoine còmhla gus searaichean a cheannaich a b’fhiach £50 a fear. Mar seo, chruinnich na daoine £7500 agus thug an HIDB, no mar as aithne dhuinn an diugh iad, HIE dhaibh an còrr dhen airgead. “Thog iad an t-airgead agus thog iad a bhùth.”
Tha Catriona Nic an Fhùcadair air a bhith os cionn bùth Èirisgeidh fad aona bliadhn’ deug. “Tha an ùine air a dhol seachad gun fhiosda orm, chan eil fhios agam cà deach na bliadhnaichean ach tha air còrdadh rium. Thàinig obair na bùtha suas, chuir mi air a shon agus gu fortanach, fhuair mi e.”
Le pandemic, ’s e àm gu math doirbh a th’ann bhith os cionn gnìomhachas sam bith, agus tha na h-Eileanan, mar a bha an còrr dhen t-saoghal, air a bhith glaiste sìos air sàilleibh Covid-19. “Tha a’ bhliadhna a th’air a dhol seachad air a bhith eadar-dhealaichte airson a h-uile duine, tha mi cinnteach. Fad an t-sàmhraidh, cha robh sinn a’ faicinn duine agus bha a’ bhùth gu math slaodach, cha robh sian a’ tachairt agus chan fhaodadh tighinn thugainn ach na daoine a bhuinneadh dhan àite.”
“Fad an t-sàmhraidh is àbhaist dhuinn a bhith a’ faicinn tòrr diofar dhaoine bho iomadach dùthaich agus tha sin math. Bidh i trang is bidh thu a’ ruith mun cuairt. Is toil leam a bhith a’ ruith mun cuairt, cha toil leam a bhith leasg is socair idir.”
Ach ged a tha gnothaichean doirbh aig daoine an dràsda tha Catriona agus Bùth Eirisgeidh a’ cumail romhpa agus a’ dèanamh an dìcheall. “Tha tòrr dhen stuth againn a bhuineas dhan àite agus a chaidh a dhèanamh anns na h-eileanan agus tha sin a còrdadh ri daoine. Bidh daoine a’ faighneachd airson diofar rudan agus bidh sinn a’ feuchainn ri measgachadh de rudan fhaighinn a-staigh. Tha sinn a reic tì is cofaidh airson a thoirt leat a-mach. Tha deagh chofaidh againn, feumaidh mi aideachadh, ’s dòcha a’ chofaidh as fhèarr a th’ann an Uibhist!”
’S fhiach seasamh innte an ath turras a tha sibh shuas aig Deas. Chì sibh na tha a dol aig Bùth Eirisgeidh air loidhne an seo.
Tha sinn an-còmhnaidh a ’coimhead airson beachdan ùra agus dòighean air fàs – cuir fios thugainn gus a dhol an sàs
We’re always looking for new ideas and ways to grow – get in touch to get involved
© 2021 Uist Beò. A Codel Project
