Fhad ’s a bha Johnny is Ceit a’ fuireach air tir-mòr agus ag ionnsachadh mar a dhèanadh iad uisge-beatha agus sineabhar, thug iad fa-near gun robh a h-uile sian a dh’fheumadh iad air an starsach ann an Uibhist. “Bha daoine a’ bruidhinn air a bhith a’ dèanamh uisge-beatha le mòine, is eòrna is uisge. Tha a h-uile sian dhe sin an seo, ach chan eil uisge-beatha againn ann an Uibhist.” Chaidh Johnny air ais dhan oilthigh a dhèanamh ceum air staileadh agus thòisich na plànaichean aca air tighinn ri chèile bhon uairsin. Thill Johnny is Ceit dhachaigh a dh’Uibhist ann an 2017 agus goirid an dèidh sinn, thàinig smuain an North Uist Distillery beò.

An dràsda, gheibhear blas Uibhist ann an trì sineabhair sònraichte a chuireas ann an sùnnd duine sam bith a tha measail air ‘refreshment’! Tha Downpour Gin air a dhèanamh le fraoch, agus cuideachd le dearcan is feàirneagan no le Grapefruit agus faodaidh daoine an stamp fhèin a chuir air na botuill a tha air an creic. “Tha sinn a ruith sgeama malartaich far am faod daoine fraoch a bhuain agus a thoirt thugainn. Gheibh iad botul sineabhar air ais agus tha sinn a toirt ainm an àite às an tàinig am fraoch sin air gach baidse. Aig aon àm, nì sinn suas ri 1700 botull ann am baidse agus an dràsda ’s ann à Griminis a thàinig am fraoch a chleachd sinn. Tha fraoch à iomadh àite air a bhith againn gu ruige seo eadar Loch Baghasdail agus Loch nam Madadh agus tha e na thlachd dhuinn gu bheil muinntir an àite gar cuideachadh leis an seo.” Tha an aon rud a tachairt leis na dearcan a thathar a cleachdadh anns an Sloe agus am Bramble Gin. “Tha sinn dìreach air ar botuill a lìonadh le dearcan à Langais, agus mar sin ’s e Langass a th’air a bhaidse seo. Tha e a’ còrdadh rinn sealltainn gu bheil sinn a’ cleachdadh measan às an àite fhèin nuair a tha daoine a’ ceannach bhuainn.”